Stefnumótun á tímum óvissu: frá spám til aðlögunar

Á þessum Dokkufundi verður fjallað um síbreytilegt rekstrarumhverfi nútímans, þar sem óvissa, hraðar breytingar og flókin samspil einkenna markaði og samfélög, þar sem hefðbundin stefnumótun stendur frammi fyrir nýjum áskorunum.
Áherslan hefur færst í auknum mæli yfir á aðlögunarhæfni, viðnámsþrótt og nýjar nálganir í stefnumótun. Þar hefur svokölluð Robust Decision-Making (RDM) nálgun rutt sér til rúms í stefnumótun.

Hver verður með okkur: Eva Magnúsdóttir, stofnandi og framkvæmdastjóri Podium ehf. Eva hefur umfangsmikla reynslu úr íslensku atvinnulífi af stjórnun og stefnumótun, sjálfbærni og samskiptamálum. Hún hefur rekið ráðgjafarfyrirtækið Podium ehf. í 11 ár þar sem hún hefur leitt stefnumótanir sveitarfélaga og fyrirtækja auk ráðgjafar í sjálfbærni. Áður var hún stjórnandi í fjarskiptaumhverfinu til fjölda ára, sat í framkvæmdastjórn Mílu og gegndi stöðu forstöðumanns samskipta hjá Símanum. Hún starfaði jafnframt sem ráðgjafi hjá KOM og sem sjálfstætt starfandi blaðamaður auk þess að ritstýra Helgarblaði DV.

Eva hefur setið fjölda námskeiða um sjálfbærni og samfélagsábyrgð þar á meðal frá Harvard Business School Online, og hefur veitt ráðgjöf, kennt og haldið fyrirlestra um stefnumótun og sjálfbærni í yfir 20 ár m.a. hjá Akademias, Háskólanum á Bifröst og í Háskóla Íslands.

Hún er með MBA gráðu í viðskiptafræði og stjórnun frá Háskóla Íslands og diplóma í hagnýtri fjölmiðlun frá sama skóla. Að auki lauk hún B.Sc gráðu í þjóðháttafræði, leikhús- og kvikmyndafræðum frá Háskólanum í Lundi í Svíþjóð.
Eva er viðurkenndur stjórnarmaður frá Akademias og hefur jafnframt lokið námskeiðinu Leiðtogi í gervigreind frá Akademias.

Hæfniþættir: Á Dokkufundum er fjallað um efni í samræmi við nýlegar hæfnirannsóknir, um hvaða hæfni er æskilegt í dag og talið er að verði í eftirspurn á næstu árum, hvort sem horft er til vinnu og vinnumarkaðar, eða til að dafna í samfélagi framtíðarinnar.