Ný hæfnirannsókn frá WEF

Nú nýlega gaf WEF út nýja skýrslu með niðurstöðum rannsóknar þar sem reynt var að lesa í vinnumarkaðinn árið 2030.

Helstu niðurstöður eru að fram til ársins 2030 er talið að 170 milljónir nýrra starfa skapist en 92 milljónir hverfi. Sem sagt aukning upp á 78 milljónir starfa. Það þýðir að um 22% allra starfa munu breytast verulega á þessum tíma.

Stærsta hindrunin fyrir fyrirtæki er færniskortur (63% atvinnurekenda nefna þetta) og talið er að um 59% alls starfsfólks þurfi verulega sí- og endurmenntun til eflingar hæfni fram til 2030, og svo væntanlega þar áfram.

Það sem atvinnurekendur/vinnustaðir ættu að vera að einbeita sér að núna:

• Uppfæra hæfni starfsfólks með sí- og endurmenntun. Þetta er sú aðgerð sem flestir atvinnurekendur (77%) áætla að grípa til vegna AI og tæknibreytinga.
• Að hugsa um tilfærslu starfsfólks innan vinnustaða, til að nýta hæfni sem best og réttast. Um helmingur fyrirtækja áætlar að færa starfsfólk úr störfum sem verða fyrir áhrifum af tækniþróun yfir í önnur hlutverk, í stað þess að segja því upp.
• Að rækta blöndu af tækniþekkingu (AI, gagnavinnsla, netöryggi) og mannlegri færni (skapandi hugsun, gagnrýnin hugsun, aðlögunarhæfni, samvinna, leiðtogafærni).
• Að huga að lýðfræðilegum breytingum – aldurssamsetning vinnuafls hefur áhrif á hvar þörfin verður mest þegar kemur að störfum og hæfni.

Það sem starfsfólk ætti að vera að einbeita sér að núna:

• Símenntun. Tæplega 40% af þeirri hæfni og færni sem þarf í starfi mun breytast. Símenntun er því ekki valkostur eða eitthvað sem má bíða, heldur algjörlega nauðsynleg og áríðandi.
• Sjálfsforysta og aðlögunarhæfni. Seigla, frumkvæði og hæfni til að bregðast við breytingum verða sífellt mikilvægari, samhliða tækniþekkingu.
• Að fylgjast með hvaða störf og starfsgreinar eru í örri þróun (t.d. umönnun, kennsla, sérfræðistörf í tækni og grænni orku) og hvaða störf eru að dragast saman (t.d. gjaldkerar, skrifstofuaðstoð, grafískir hönnuðir o.fl.).

Dokkan lítur á það sem hlutverk sitt að styðja vinnustaði, starfsfólk og einstaklinga við að búa sig undir framtíðina, með því að bjóða upp á hæfnitengda örfræðslu og staðnámskeið.