Glæstar vonir eða markviss forysta?

Flest fyrirtæki og stofnanir setja sér metnaðarfulla stefnu. En færri skilgreina hvernig stjórnendateymið ætlar að leiða hana í framkvæmd.

Án skýrs leikkerfis stjórnendateymisins verða skilaboð misvísandi, forgangsröðun óskýr og mikil sóun í daglegum rekstri. Samstilling allra í skipulagsheildinni gerist ekki sjálfkrafa – það er meðvituð ákvörðun og þörf á markvissum aðgerðum.

Á þessum Dokkufundi skoðum við hvernig skýrar „línur á leikvellinum“ og traustir hornsteinar í stjórnun skapa sameiginlegan ramma sem breytir stefnu í raunverulegan árangur.

Fyrirlesturinn er fyrir þau sem vilja hætta að vona – og byrja að innleiða stefnu með markvissum hætti þar sem starfsfólkið blómstrar.

Hver verður með okkur?
Maríanna Magnúsdóttir, alþjóðlegur ráðgjafi, umbreytingarleiðtogi og markþjálfi sem vinnur með stjórnendum og teymum að því að innleiða stefnu í gegnum menningu með nútíma stjórnun og meðvitaðri forystu. Hún er viðurkenndur WorldBlu Partner og starfar bæði á Íslandi og á alþjóðavettvangi.

Maríanna er stofnandi Improvement og meðeigandi og ráðgjafi Hugsýnar. Hún hefur sérhæft sig í nútíma stjórnun og leiðtogafræðum með áherslu á innleiðingu stefnu, umbreytingarvegferðir, vinnustaðamenningu og mannlega þáttinn í breytingum.
Hún býr yfir víðtækri reynslu sem stjórnandi, stjórnunarráðgjafi, leiðtogamarkþjálfi, teymisþjálfari og lóðs. Hún hefur unnið með einstaklingum, framkvæmdastjórnum og skipulagsheildum að því að vinna markvissar og skynsamlegar, auka árangur og leiða af meiri meðvitund og kærleika. Hún er einnig eftirsóttur fyrirlesari og leiðir reglulega vinnustofur, námskeið og stefnumótandi samtöl.

Hæfniþættir: Á Dokkufundum er fjallað um efni í samræmi við nýlegar hæfnirannsóknir, um hvaða hæfni er æskilegt í dag og talið er að verði í eftirspurn á næstu árum, hvort sem horft er til vinnu og vinnumarkaðar, eða til að dafna í samfélagi framtíðarinnar.